NÝTT FORLAG Á GÖMLUM GRUNNI

Bókaforlagið Veröld var sett á laggirnar árið 2005 og voru stofnendur Ólafur Ragnarsson og Pétur Már Ólafsson. Áður höfðu þeir starfað saman um árabil sem útgefendur hjá Vöku-Helgafelli og Eddu útgáfu. Ólafur dró sig út úr fyrirtækinu árið 2006 sökum heilsubrests og lést hann þann 27. mars 2008. Veröld sameinaðist bókaútgáfunni Bjarti í apríl 2007. Pétur Már var áfram útgefandi hjá Veröld og Snæbjörn Arngrímsson útgefandi hjá Bjarti. Í ágúst 2008 keypti Pétur Már hlut Snæbjörns í forlaginu og er nú einn útgefandi hjá Bjarti-Veröld. Útgáfustjóri Veraldar er Bjarni Þorsteinsson. Vinaforlag Veraldar í Danmörku er Hr. Ferdinand en þar ræður Snæbjörn ríkjum ásamt Susanne Torpe.

Veröld gefur út íslenskan og erlendan skáldskap, handbækur, ævisögur og barna- og unglingabækur. Meðal höfunda sem koma út undir merkjum Veraldar má nefna Yrsu Sigurðardóttur, nóbelsskáldið Günter Grass, Sasa Stanisic og spennusagnahöfundurinn John Grisham. Veröld gefur einnig út vinsælar ævisögur og má þar nefna viðtalsbók Eddu Andrésdóttur við sr. Auði Eir Vilhjálmsdóttur og ævisögu Guðna Ágústssonar eftir Sigmund Erni Rúnarsson. Þá gaf Veröld út bók Ólafs Ragnarssonar Til fundar við skáldið Halldór Laxness.

Þá rekur Veröld einnig réttindastofu sem annast sölu á útgáfurétti á verkum íslenskra höfunda til erlendra bókaforlaga. Þegar á fyrsta starfsári sínu seldi réttindastofan Þriðja táknið eftir Yrsu Sigurðardóttur um víða veröld og kemur hún nú út á yfir þrjátíu tungumálum í yfir eitt hundrað löndum í öllum byggðum heimsálfum jarðar.